E Romani Historija

E Ghazna Dinastia, sas e sherutni katar o dujto maj bari Islamico Imperecija anda e lumiaki historija. Lengo teritory sas katar kodo so ages si Afghanistan thaj Pakistan ko Esto ko Caspiko Paj ando Vesto. Mashkar 997 thaj 999, jekh Civilno Maripe phaglas e Ghazna Dinastia. E phrala Ismail thaj Mahmoud marde pes anda regiono, savo o Mahmoud maj palal las les thaj peske phralesa sas te marel pes anda kodo. Kana sas te lel vi aver phuva pala kodo, vov nakhlas 17 var anda Pajab regiono (prindzardo vi sar Sindh regiono). Kade sar vov sichiardas ande bare foruria sar o Gwailor, Kanaui thaj Mathura kodo sikavel ke militarichno plano kerdas.

O Kadir, o kajfo katar o Bagdad, akceptujsardas o sherutnipe e Mahmudosko ando Esto, thaj bichaldas leske jekh honorarichno roba/rochia/coxa rashaij thaj das leske uni tituluri. Katar kado punkto, o anav Kadir sas pasha lesko anav pe sa e hurde love savo o Mahmud stampilisardas. Kodo so o kalifo kerdas sa kade akceptujsardas les ande peske islamisko pachaijmata thaj las decizija te lel akcija kontra e idolatorengi ande India.
Kana vov marelas pes te lel e phuvja anda Nord India mashkar 1005 thaj 1030, o Mahmoud Ghazna intrigo vrama lelas pesa sklavuri. Ando 1005to bersh, o Mahmoud las o plaj Panjab thaj astardas te dzal ande Nord India. Leske armii/katane sas protektujme katar e bare purane khera, e chachi zor leke katanaki sas sar von organizujnas pes thaj sar dzanenas te planujn.
E Seldchuks (dik sa kade 2.7) tela o Tugrif Beg aparisardas e Ghaznadisko satana ando 1040to bersh, thaj kade ashade e Ghazna Dinastia te buxliol karing o Vest.
E ketana sas kerdi anda slavenge trupe, thaj savore katar maj but nacii khetane sas shute. Kadi sas leski baza, leski zor ande ketana. E aver rig anda leski ketana sas kerdi anda voluntaruri thaj mercenaruri.

E themesko sistemo bazilas pes pe duj fundamenturi. Anglunes, sas e anglune kampanii karing e adunchi-barvale regionuri anda Nord India. Dujto, e taksi. Anda o Mahmoud leske ketanii kindenas e taksi, thaj len sas len interesso pe kodo anda kodo ke vi von shaj lenas love kana lengo sherutno barvalo sas.

E ketanii katar o Mahmoud sas kerde anda profesionalne soldaturisave avile anda intrebo luma te keren leske buki. E trupe kerde anda sklavuri, sas maj but te aven anglal thaj kana trebulas vi ando maripe te dzan.
Kadala sklavuri, maj but anda lende buchiarne, chi sas feri anda ketana ale vi ando sistemo e themesko. Kado sas o sekreto sar o Mahmoud nerisardas. E but sklavuri save sas ande e Mahmoudeski ketana von sas sichiarde te keren arta thaj buki ando sastri, sumnakaj, rup etc. thaj von lasharde e komercialne kondicii katar e industria katar e Ghazana Dinastia.
Ando 1017to bersh, phnel pe ke o Mahmoud de ghazna andas maj but sar 50 000 sklavuri anda Khorezm.

Ande kodi vrama, chi bririnas aba te avel varekon kontra e zoraki e Mahmoudoski. 54 000 manusha grastenca thaj 1 300 elefanturi sas lesa kana dzalas te lel avera phuvia, thaj pashe sas inke leski sofistikime artileria.
Kana vov sas sherutno, o Mahmoud gelas ande India aba svako bersh. Kodo ke vov kothe gelas chi andas feri nasulipe e Indiake, ale vi mishtipe. Tela e influenca e Dinastiake Ghazna, e India lokhores astardas te putrel pes karing o Islamicko dzanglipe, filosofia thaj literatura. Sar o Mahmoud kothe sas, o Islamo astardas te dzal maj dur ande kado regiono thaj lokhores las o than e Buddhismoske thaj Hindujsmoske.
Thaj kade, o intrego regiono lasheajlo tela o sherutnipe e Mahmoudosko de Ghazna, savo korkori das peske titulo sar sultano. O maj vazhno foro anda e imparacija Ghazna, savo sas vi o foro kaj o Ghazna arakhadilas, sas but prindzardo ande kodi vrama anda leske shukar gredini thaj bare khera thaj palaturi. Uni anda lende si inke vi ages. O Mahmoud kerdas o foro Ghazna jekh literaturako thaj artako foro thaj ingiardas kado ande regionuri. E influenci katar e Islamiska edukacija thaj Persiano kultura ande India sas len efekturi ande aktualne arta thaj literatura.
O Mahmoud de Ghazna sas but prindzardo sar jekh generalo bute eksperiencasa thaj bute kuradzosa ande marimaski vrama thaj jekh but inteligento thaj lasho sherutno ande pacheaki vrama.
Leski militarichno kariera sar agosardi kana gelas ande Persia. Kodi sas vi e maj palutni bari akcija, vov mulas ando 1030to bersh kana sas 59 bershengo. Vov mulas ande Agra.
Pala so o Mahmoud mulas, e Seldchuks, e Ghurides, e Chwaresm-Shahs thaj aver turkicka triburi darade e zor katar e Dinastia Ghazna.

E Imperecija astardas te phagel pes. O angluno semno sas o maripe kaj xasarde les angla e Seldchuks ando 1040-1041 ando Dandanqan. O Mas´du de Ghazna, kodo so las e zor pala o Mahmoud, nashlas palem ke Ghazna thaj mukhlas o Chorassahn ke Seldchukuri.

E Ghuriduri, jekh narodo anda e Nord rig e Afghanistanoski, barilas thaj ashilas e dinastia de Ghur ande k-aver shel bersh. O Mahmoud de Ghazna kerdas kontrola pe kado narodo, ale kodo so avilas pala leste chi birisardas te kontroluil o Ghur. Anda kodo ke jekh familiarno problemo sas mashkar e Ghurides thaj e Ghaznadianuri, e Ghurides mardas len ando 1186to bersh. Kade sar phiravenas pes e sklavonca Roma maj dur gelas sa kade. Pala so e imperecija e Ghazna phagilas, maj but cikne islamichno emiraturi avile ando regiono, thaj o Chwaresm-Shahs las e imperecija savi sas tela ordino e Seldchukongi. Ke kodi vrama chi sas chi sosko imperato/thagar akceptujme, thaj kade e duj generaluri e sklavenge anda e dinastia Ghazna; Yildiz thaj Aybak, lile peski independenca katar e dinastia Ghazna thaj Dehli. O Yildiz thajo Aybak sas aba maj palal marde katar e Ghurides ando 1206to bersh. Kadala marimata kerde te slobodinpe maj but Roma katar e sklavia.

Mashkar 1186to bersh thaj 1266to bersh, e Roma nasale ande maj but riga. Ma but anda lende nashle ko thagaripen “Rum-Seldchuks” (dikh vi 2.7), aver rig gele ke Mamelukuri (dikh vi 2.5). thaj e reshta ashile ande angluni thaj dujto “Sklavijaki Dinastija”, katar von von xastrajle ando 13to shel bersh. E maj palutni grupa e Romengi savi slobodisajle vaj avile ke Europa vaj ashile ando regiono ande cikne grupi.